O Día do Traballo é a principal festa do movemento
obreiro internacional e celébrase por
todo o mundo con reivindicacións sociais e laborais.
Países
de todo o mundo estableceron como día festivo o Primeiro de Maio, como se chama
popularmente ao Día do Traballo.
A maioría das democracias europeas e latinoamericanas e os principais países
comunistas, como China, Corea do Norte, Vietnam ou Cuba, son países nos cales se trata dunha das
celebracións de maior transcendencia ao longo do ano.
A data
de celebración estableceuse en 1889 como recordo dos coñecidos como Mártires de Chicago, uns sindicalistas anarquistas que
participaban en 1886 na cidade estadounidense nunha marcha a favor da xornada
laboral de 8 horas pois, daquela, os empresarios esixían aos obreiros traballar
doce e ata catorce horas diarias, durante seis días á semana. Nesa
manifestación, oito
anarquistas foron detidos de forma totalmente arbitraria e o xuízo caracterizouse
por unha falta absoluta de probas. Pero, aínda así, firmaron sentencia de morte
para cinco deles e cadea perpetua para os outros tres.
Será en 1890 cando se
celebre por primeira vez en España o Primeiro de Maio, con manifestacións en
Barcelona, Madrid e Bilbao. Ese mesmo ano iniciábase tamén en Ferrol a
celebración do 1º de Maio como Festa do Traballo e xornada reivindicativa, lúdica
e festiva, promovida polas diversas sociedades de oficio. Ese 1º de Maio
aparece en Ferrol tamén o primeiro número do periódico quincenal "El
Obrero. Defensor de la clase obrera", que dirixe Francisco Fernández
García. O ano seguinte aprovéitase esa data do 1º de Maio para facer unha Folga
Xeral en A Coruña, na cal reivindicaban a xornada laboral de 8 horas.
É
curioso que o país no que sucederon os feitos, Estados Unidos, celebre o «Labor
Day» en setembro, do mesmo xeito que os seus veciños canadenses, xa que o
presidente Grover Cleveland pensaba que o recordo dos Mártires no Día do Traballo podía dar ás ao
movemento socialista no país.
Incluso
a Igrexa daría o seu apoio á data elixida como Día do Traballo polo movemento obreiro e, en 1954, o papa Pío XII
recoñecía a xornada ao declarala festividade de San José Obreiro.
Todos
os anos o movemento obreiro sae á rúa cun lema. Este ano é “Menos dereitos,
máis pobreza”. Mais, tal e como están as cousas, un bo lema sería “Deus dea
traballo a cada un no seu”, como dicía o enterramortos.
